Tetun Português English

PERGUNTA EMA HUSU BEIBEIK

Saida mak fronteiras marítimas?

Estadu sira ne’ebé tasi haleu (kosteiru) iha direitu atu defini ka ‘delimita’ extensaun husi sira nia teritóriu marítimu tuir lei internasional.

Nasoens Unidas nia Konvensaun ba Lei Tasi nian [UNCLOS] mak lidera tratadu multilateral ba lei tasi nian. Timor-Leste, Austrália no Indonézia asina hotu UNCLOS.

UNCLOS rekoñese direitu oin-oin kona ba área marítima, hanesan tasi teritórial (besik tasi-ibun), Zona Ekonómika Eskluziva (ZEE) (ne’ebé bele luan to’o 200 millas naútikas), no plataforma kontinental (ne’ebé bele iha ZEE nia okos ka iha sirkumstânsia balu nia bele luan liu tan ZEE).

maritime zones pale

Figura iha leten reprezenta saida mak Nasaun ida bele hetan tuir lei internasional, bainhira la iha reivindikasaun ne’ebé tatulak malu ho nia Nasaun viziñu sira.

Saida mak tasi teritórial?

Tasi territorial nia luan to’o 12 millas naútikas husi liña baze Estadu ida nian (ne’ebé jeralmente dada tuir liña bee-badak iha tasi-ibun). Estadu sira iha kontrolu ba espasu aéreu ka lalehan iha tasi teritórial nia leten no bee laran, tasi-kidun no rai-okos.

Saida mak Zona Ekonómika Eskluziva?

Zona Ekonómika Eskluziva nia luan to’o 200 millas naútikas hahú husi Estadu ida nia liña baze. Iha zona ne’e nia laran, Estadu sira iha direitu, atu esplora rekursu sira ne’ebe moris ka maten iha tasi-kidun, rai-okos no bee laran, inklui rekursu petróleu no peskas.

Saida mak plataforma kontinental?

Plataforma kontinental nia luan liu husi 200 millas naútikas husi Estadu ida nia liña baze. Iha kazu balu, Estadu ida bele reivindika ba plataforma kontinental ne’ebé nia extensaun luan liu husi 200 millas naútikas bainhira iha ‘prolongamentu natural’ ba plataforma ne’e. Estadu sira bele esplora rekursu sira ne’ebé iha tasi-kidun no rai-okos plataforma kontinental ne’e nian.

Saida mak akontese bainhira Estadu sira iha reivindikasaun ne’ebé tatulak malu?

Bainhira Estadu viziñu sira (ho tasi-ibun hateke malu ka rabat malu) iha reivindikasaun ne’ebé tatulak malu ba direitu ZEE ka plataforma kontinental, UNCLOS eziji atu sira buka hetan akordu ba fronteira marítima permanente ida tuir lei internasional, atu nune’e bele hetan solusaun ne’ebé ekitativa.

Saida mak Timor-Leste hakarak?

Timor-Leste seidauk iha fronteiras marítimas permanente ho nia viziñu sira, Austrália no Indonézia. Timor-Leste buka hela atu estabelese nia fronteiras marítimas permanente ho nia viziñu sira tuir nia direitu bazeia ba lei internasional, tanba ida ne’e obrigatóriu ba nia atu halo, hanesan Estadu ida hola parte ba UNCLOS.

Timor-Leste servisu makaas atu hametin relasaun forte ho nia viziñu sira, bazeia ba onestidade (laran moos ba malu), respeitu no igualdade. Relasaun forte ida ne’e sei hetan liu husi alkansa rezolusaun amigavel ida ba nia fronteiras marítimas.

Tanba sá mak fronteiras marítimas ne’e impotante tebtebes ba Timor-Leste?

Determina fronteiras marítimas ne’e sai tiha ona kestaun ida ba Timor-Leste nia prioridade nasional, hanesan hakat ikus hodi estabiliza nia soberania nudar Estadu ne’ebé foin independente. Ba povu Timor-Leste, asegura direitu ba teritóriu marítimu nasaun nian ne’e hanesan kontinuasaun husi nia luta naruk ba soberania no independênsia. Fronteiras Marítimas sei permite Timor-Leste esplora diak liu tan nia rekursu sira, petróleu no peska, enkoraja negósiu no investimentu, no aumenta fonte reseita ba fundu soberanu fundu rikusoin, ne’ebé hanesan fundu ida utiliza hodi dezenvolve futuru ne’ebé prósperu ba povu Timor-Leste.

“Asegura fronteiras marítimas mak kestaun soberania ida ba povu Timor-Leste.”

Saida deit mak Timor-Leste nia direitu tuir lei internasional?

UNCLOS impoen obrigasaun ida ba Nasaun sira, atu defini sira nia fronteiras marítimas permanentes ho Nasaun viziñu sira liu husi akordu. Bainhira iha reivindikasaun ne’ebé tatulak malu (ne’e mak, distânsia entre kosta rua la tó 400 millas naútikas), baibain, lei internasional hili dalan dada liña klaran ka liña ekidistânsia entre nasaun rua ne’e, no halo ajustes tuir kondisaun relevante (se karik iha), atu nune’e bele hetan solusaun ne’ebé ekitativa.Ida ne’e mak koñesidu hanesan “dalan ekidistânsia/kondisaun ne’ebé relevante” ba delimitasaun fronteira marítima. Iha kazu barak, dada liña ekidistânsia ne’ebé ajusta ona, sei sai hanesan solusaun ekitativa ida tuir lei internasional.

Timor-Leste bele ba tribunal hodi asegura nia direitu marítimu iha tasi timor ka, lae?

Timor-Leste la iha kbiit atu ezije ba tribunal ka orgaun judisial ida atu determina ninia fronteiras marítimas ho Austrália. Iha 2002, fulan rua molok Timor-Leste hetan independênsia, Austrália hato’o deklarasaun ba Tribunal Internasional ba Justisa no UNCLOS ne’ebé ‘hasés án tiha’ ka sai husi jurisdisaun Tribunal ninian no prosedimentu rezolusaun disputa seluk ne’ebé kesi-metin bazeia ba UNCLOS relasiona ho fronteiras marítimas. Nia rezultadu mak la iha tan opsaun seluk ba Timor-Leste hodi buka hetan buat ida ne’ebé bele kesi-metin determinasaun husi tribunal internasional relasiona ho pozisaun fronteiras marítimas Timor-Leste nian ho Austrália bazeia ba Lei Internasional.

“Timor-Leste la husu liu husi nia direitu tuir lei internasional.”

Negosiasaun ho Indonézia to’o iha ne’ebé ona?

Líderes husi Timor-Leste ho Indonézia konkorda iha Agustu 2015 atu hafoun no haluan tan diskusaun sira, kona ba fronteiras marítimas no rai. Timor-Leste hahú koalia ho Indonézia hodi delimita fronteiras marítimas permanente iha Setembru 2015. Fronteira rai rohan balu ne’ebé seidauk rezolve sei finaliza iha tempu badak nia laran.

Iha konsultasaun sira ne’ebé halao ona kona ba fronteiras marítimas, Indonézia no Timor-Leste dezenvolve hamutuk Oritentadores Prinsipais no Planu Servisu hodi halo negosiasaun. Estadu rua afirma katak pozisaun ba fronteiras marítimas permanente tenki negosia tuir lei internasional, liu-liu UNCLOS. Negosiasaun formal kona ba fronteiras marítimas sei hahú iha 2016.

Indonézia estabelese tiha ona nia fronteiras marítimas ho nasaun viziñu sira-seluk ka, seidauk?

Indonézia iha viziñu sanulu ne’ebé fahe malu ho tasi. Husi viziñu hirak ne’e, Timor-Leste ho Palau mak Indonézia seidauk halo akordu ida kona ba fronteira marítima no nia hahú koalia ona ho nasaun rua ne’e.

Negosiasaun fronteira marítima ho Austrália to’o iha ne’ebé ona?

To’o oras ne’e foin mak halo arranjus provizórius entre Austrália ho Timor-Leste atu jere atividades petróleu ho gás nian iha Tasi Timor. Aranju hirak ne’e la afeta ba interese legal delimitasaun final fronteiras marítimas nian. Aranju hanesan ne’e no UNCLOSezije espesifikamente no obriga klaramente ba nasaun rua atu negosia akordu ida ba fronteiras marítimas ne’ebé permanente.

Maske ho obrigasaun sira ne’e, Austrália kaer metin los ba kláuzula ‘moratória’ida ne’ebé bazeia ba CMATS no to’o agora lakohi negosia fronteiras marítimas permanentes ho Timor-Leste. Tanba Austrália la rekoñese jurisdisaun kona-ba fronteiras marítima tribunais internasionais nian, mak fronteira marítima permanente ho Austrália só bele deside liu husi negosiasaun bilateral.

Akordu provizóriu entre Timor-Leste no Austrália mak saida deit?

Molok Timor-Leste restaura fali nia independênsia iha 2002, Austrália ho Nasoens Unidas halo tiha Akordu Tasi Timor durante períodu administrasaun Nasoens Unidas nian, bazeia ba Tratadu Timor Gap ne’ebé Austrália ho Indonézia halo durante tempu okupasaun. Tratadu ne’e estabelese aranjus fahe rekursu sira provizoriamente no estabelese Área Konjunta ba Dezenvolvimentu Petrolíferu [JPDA] iha Tasi Timor.

Akordu ne’e troka tiha ona ho tratadu ida ne’ebé mak atu hanesan – Tratadu Tasi Timor, governu Austrália ho Timor-Leste konkorda no asina iha 20 Maiu 2002 – iha loron ne’ebé Timor-Leste restaura fali nia independênsia.

Hafoin liu tiha Tratadu Tasi Timor, Austrália ho Timor-Leste tama iha rejimi espesial ne’ebé relasiona ho área Greater Sunrise, ne’ebé koñesidu hanesan Akordu Unitizasaun.

Tratadu Determinadus Ajustes Marítimus iha Tasi Timor [CMATS]asina iha 12 Janeiru 2006. Durante negosiasaun ba tratadu ida ne’e mak alegadamente Austrália hafuhu Timor-Leste nia ekipa negosiasaun. Enkuantu tratadu ida ne’e hateten katak nia sei la prejudika delimitasaun final ba fronteiras marítimas, nia mos inklui klaúzula moratória ida hateten katak nasaun rua ne’e sei la afirma, buka ka avansa liu husi dalan saida deit hodi reivindika direitu soberania, jurisdisaun no fronteiras marítimas durante tinan 50. Timor-Leste dehan katak moratória ne’e la konsistente ho Timor-Leste nia direitu atu delimita ninia fronteira marítima permanente no ho obrigasaun tuir UNCLOS ba nasaun viziñu sira atu konkorda ba fronteiras marítimas permanentes, no laós atu tau risku ka taka fali dalan hodi hakat ba akordu final.

Akordu provizóriu hirak ne’e fahe reseitas husi extrasaun petróleu no gás iha Área Konjunta Dezenvolvimentu Petróleu no Greater Sunrise entre Austrália ho Timor-Leste. Maibé, CMATS rekoñese jurisdisaun Timor-Leste nian ba rekursu hotu-hotu iha bee laran (hanesan peskas) ne’ebé tama iha área konjunta.

Austrália estabelese tiha ona ninia fronterias marítimas ho nia viziñu sira-seluk ka, seidauk?

Austrália halo tiha ona akordu kona-ba fronteiras marítimas ho nia viziñu sira-seluk, maibé seidauk halo ho Timor-Leste. Hela deit 2% husi ninia fronteira marítima mak seidauk rezolve – ne’e mak área ne’ebé sei ba halo negosiasaun ho Timor-Leste.

Tanba sá mak Timor-Leste hahú kazu rua hodi kontra Austrália?

Arbitrajen espionajen

Iha 23 Abril 2013, Timor-Leste hahú prosedimentu arbitrajen bazeia ba Tratadu Tasi Timor iha 2002 iha Tribunal Permanente ba Arbitrajen iha Haia, hafoin iha alegasaun kona ba espionajen durante hala’o negosiasaun ba tratadu CMATS iha 2006 nian. Timor-Leste submete bazeia ba alegasaun sira husi hahalok espionajen nian no tuir prinsípiu lei internasional rekoñese, tribunal tenki ho konsekuênsia deklara katak Tratadu Tasi Timor iha 2002 mak sei vale tuir nia termu orijinal sira. Arbitrajen ne’e sei lao hela.

Tribunal Internasional ba Justisa kazu hadau dokumentu

Iha fulan Dezembru 2013, durante arbitrajen kona-ba espionajen, ofisiais intelijensia Austrália nian hadau tiha dokumentu legal sira ho dadus ne’ebé pertense ba Timor-Leste, inklui dokumentu sira ne’ebé relasiona ho arbitrajen, husi Advogadu Timor-Leste nian ida iha Kambera. Hafoin Austrália rejeita atu fó-fila dokumentu hirak ne’ebé sira hadau, Timor-Leste halo asaun iha Tribunal Internasional ba Justisa hodi prevene Austrália atu la bele uza dokumentu hirak ne’e,no atu hetan fila fali dokumentu sira ne’e.

Iha faze inísiu kazu ne’e nian, Tribunal deside a-favor Timor-Leste, no garante Medidas Provizórias hodi bandu Austrália atu la bele interfere tan iha komunikasaun entre Timor-Leste ho ninia advogadu jurídiku sira no ezije ba Austrália atu taka metin materiais ne’ebé sira hadau to’o desizaun final.

Proseu kazu rua ne’e halo nusa?

Hafoin Timor-Leste hetan susesu iha Tribunal Internasional ba Justisa, Austrália husu atu suspende prosedimentu rua ne’e ba fulan neen hodi koko rezolve disputa ne’e ho laran luak. Halo tiha konsultasaun dala barak, Austrália rejeita buat ne’ebé Timor-Leste propoen hodi hahú negosiasaun ne’ebé estruturada kona-ba fronteira marítima permanente. Austrália kontra-proposta diskusaun bilateral seluktán, maibé lakohi ko’alia kona-ba fronteiras marítimas permanentes hanesan parte husi diskusaun ne’e nian.

Hafoin hapara tiha konsultasaun sira ne’e, Austrália fó fila fali dokumentu sira ne’ebé sira hadau ho dadus no rekoñese importânsia husi Estadus hotu-hotu atu respeita konfidensialidade ba komunikasaun entreEstadusiraho sira-nia asesor jurídikusira. Ho baze hirak ne’e, Timor-Leste termina tiha kazu ne’e. Timor-Leste tuir mai reativa fali arbitrajen espionajen.

Arbitrajen ho Austrália ikus ne’e kona ba ‘jurisdisaun eskluziva’ nia relevansia mak saida?

Molok 2013 remata, Governu Austrália envolve iha disputa naruk ida kona ba impostu entre Timor-Leste ho kontratores petrolíferas ne’ebé halao operasaun iha Área Konjunta Dezenvolvimentu Petrolífera, área ida iha Tasi Timor ne’ebé nasaun rua ne’e fahe ba malu provizoriamente. Austrália reivindika katak nia mak iha jurisdisaun ‘eskluziva’ (inklui taxa) ba kadoras ne’ebé liga mai Área Konjunta Dezenvolvimentu Petrolíferu. Timor-Leste no Austrália buka atu rezolve problema ne’e liu husi konsultasaun durante fulan 18 resin, maibé tanba la hetan rezolusaun ida, Timor-Leste proteje ninia interese sira hodi hahú arbitrajen ida. Arbitrajen ne’e la’os kona ba realizasaun ba fronteiras marítimas permanente entre Austrália no Timor-Leste.

Akordu fronteira marítima permanente ho Austrália ne’e signifika saida ba kompañia sira ne’ebé servisu hela iha Tasi Timor?

Akordu fronteira marítima permanente entre Austrália no Timor-Leste sei kria seguransa ba investidor no kompañia sira ne’ebé servisu iha Tasi Timor. Timor-Leste kompromete atu hamenus interupsaun ba sebisu sira ne’ebé halao hela no hodi asegura katak atividade sira ne’e bele kontinua ho kondisaun ne’ebé hanesan ho aranju provizóriu sira ne’ebé lao hela.

Timor-Leste apoia dezenvolvimentu Greater Sunrise maibé nia mos kaer metin katak CMATS inválidu, ne’e konsistente ka, lae?

Loos, asaun saida deit mak Timor-Leste halo ho dezenvolvedores Greater Sunrise ne’e konsistente nafatin ho nia pozisaun katak tratadu CMATS ne’e inválidu (no kontinua ho Tratadu Tasi Timor).

Timor-Leste kontinua apoia dezenvolvimentu Greater Sunrise, inklui kadoras mai Timor-Leste. Dezenvolvimentu Greater Sunrise sei sai transformador boot ba ekonomia Timor-Leste nian, liu husi aselera kreximentu, kampu servisu no dezenvolvimentu infra-estrutura. Timor-Leste kontinua kompromete ba servisu hamutuk ho empreza petróleu no gáz sira, inklui kompañia sira ne’ebé halao hela sira nia servisu iha Tasi Timor, atu hodi promove dezenvolvimentu ekonómiku nasaun nian.

Tanba sá mak Timor-Leste prioritiza kestaun fronteiras marítimas agora?

Governu Timor-Leste sempre hakarak finaliza fronteiras marítimas no nia lei refleta pozisaun ida ne’e. Timor-Leste agora iha pozisaun, atu asegura nia soberania kompleta no estabelese fonteira marítima permanente ida. Timor-Leste prontu, atu hakat ba oin ho respeitu hodi finaliza nia fronteiras marítimas tuir prinsípiu lei internasional. Asegura fronteira marítimas permanente sei fornese serteza ba kompañia sira ne’ebé buka atu investe iha atividade esplorasaun no estrasaun iha Tasi Timor.