Tetun Português English

AUSTRÁLIA

Kompara ho área marítima sira seluk iha mundu, Austrália nia área marítima mos hanesan área marítima ida ne’ebé boot iha mundu, ne’ebé estabelese liu husi nia reivindikasaun ba plataforma kontinental no liu husi akordu ho nia viziñu marítimu sira seluk, inklui Indonézia, Papua Nova Guiné, Nova Kaledonia, Illa Salomaun no Nova Zelândia. Maibé, to’o agora Austrália lakohi tama ba negosiasaun ho Timor-Leste ba fronteira marítima permanente ida, ne’ebé reprezenta 2% deit husi Austrália nia fronteira marítima tomak.

Loron uluk sira husi Timoroan nia nasaun no Austrália nia hasés-aan

Entre votasaun istóriku ba independênsia iha 1999 no restaurasaun ba independênsia iha Maiu 2002, Nasoens Unidas mak responsável ba administrasaun iha East Timor, naran ida ne’ebé ema hatene no hodi bolu Timor-Leste iha tempu ne’ebá. Durante periódu tranzisaun, iha Jullu 2001 Austrália no Administrasaun Tranzitória Nasoens Unidas iha Timor-Leste [UNTAET] asina akordu ida hodi fahe rekursu sira iha Tasi Timor. Akordu ne’e pretende fó direitu ba Austrália ba rekursu sira ne’ebé nia luan to’o Timor Trough, besik 50 millas naútikas husi Timor-Leste nia tasi-ibun – dook liu kedas husi saida mak Austrália iha direitu tuir lei internasional se dada liña klaran ida, liu husi ekidistânsia / dalan sirkumstânsia relevante.

Iha Marsu 2002, fulan rua molok restaura fali Timor-Leste nia independênsia, Austrália hasés-aan tiha husi jurisdisaun ba fronteira marítima husi Tribunal Internasional ba Justisa no Tribunal Internasional ba Lei Tasi nian. Ida ne’e signifika katak se la bele hetan akordu ida ho Austrália, nasaun foun Timor-Leste la bele husu ba tribunal internasional ida, atu desidi fronteira ekitativa iha Tasi Timor mak iha ne’ebé tuir lei internasional.

Nasaun foun Timor-Leste asina Tratadu Tasi Timor ho Austrália iha nia loron dahuluk ba nia independênsia, 20 Maiu 2002.

Austrália nia alegada espionajen no hadau dokumentu sira Timor-Leste nian.

Tuir mai Austrália no Timor-Leste negosia tan tratadu seluk hodi defini termu ba fahe rekursu no kontrola regulamentu iha Área Konjunta ba Dezenvolvimentu Petrolíferu no iha kampu Greater Sunrise ne’ebé luan to’o bee ne’ebé Austrália dehan ninian tuir teoria plataforma kontinental tempu uluk nian. Entre 2004 no 2006 Timor-Leste no Austrália negosia termu sira ba Determinadus Ajusted Marítimu iha Tasi Timor [CMATS] no Akordu entre Governu Repúblika Demokrátika Timor-Leste no Governu Austrália kona ba Unitizasaun ba Kampu Sunrise no Troubador (Akordu Unitizasaun).

Hafoin hetan tiha evidênsia ba Austrália nia operasaun espionajen ida durante negosiasaun ba CMATS, Timor-Leste dezafia CMATS nia validade no Tratadu Tasi Timor ne’ebé mak troka ona iha Tribunal Arbitrajen Permanente.

Iha 3 Dezembru 2013, Austrália nia ofisial ba seguransa intelijênsia sira hadau Timor-Leste nia dokumentu no dadus husi Timor-Leste nia advogadu ida, inklui dokumentu legal kona ba arbitrajen ne’ebé hahú ona entre Estadu rua ne’e. Governu Austrália lakohi fó fila fali dokumentu hirak ne’e. Timor-Leste hahú prosesu iha Tribunal Internasional ba Justisa hodi buka deklarasun ida katak asaltu no hadau material hirak ne’e ilegal.

Iha Marsu 2014, Tribunal Internasional ba Justisa hatún desizaun provizóriu ne’ebé liu kedas husi saida mak Timor-Leste hakarak no haruka Austrália atu la bele interfere iha komunikasaun entre Timor-Leste nia Governu no nia konselleiru legal sira. Austrália husi ne’e kedas rekoñese nesesidade ba Estadu sira, atu respeita konfidensialidade ba komunikasaun entre Estadu no sira nia konselleiru legal sira.

Iha Setembru 2014, Timor-Leste no Austrália konkorda atu adia lai arbitrajen espionajen no kazu hadau dokumentu durante fulan neen hodi atinji rezolusaun amigável ida ba sira nia disputa. Sira la atinji akordu ida iha tempu ne’ebá. Bainhira Timor-Leste buka atu envolve Austrália iha negosiasaun ne’ebé estruturadu ba fronteira marítima permanente, Austrália hatudu nia falta de vontade hodi koalia kona ba kestaun fronteira marítima permanente.

Iha Maiu 2015, tinan ida liu tiha husi asaltu ba Timor-Leste nia gabinete legal nian, Austrália fó fila fali dokumentu ho dadus hirak ne’ebé sira hadau. Ho tiha rezultadu pozitivu ne’e, Timor-Leste hapara tiha prosesu hadau dokumentu iha Tribunal Internasional ba Justisa.

ICJ_picture

Iha audensia iha Tribunal Internasional ba Justisa in Haia entre Timor-Leste no Austrália, Fonte: Nasoens Unidas

 

Plataforma kontinental

Plataforma kontinental konsisti husi tasi-kidun no rai iha nia okos. Tuir UNCLOS, Estadu kosteiru ida iha direitu ba plataforma kontinental ne’ebé nia luan to’o oitoan liu mak 200 millas naútikas husi Estadu ida nia liña baze. Iha kazu balu (ezemplu bainhira la iha reivindikasaun ne’ebé tatulak malu husi Estadu seluk), Estadu ida bele reivindika plataforma kontinental liu husi 200 millas naútikas bainhira iha ‘prolongasaun natural’ husi plataforma ne’e. Austrália rekoñese tiha ona reivindaksaun ba plataforma kontinental liu husi 200 millas naútikas ba Zona Ekonómika Eskluziva iha parte balu husi nia liña tasi-ibun.

Tribunal Internasional ba Justisa

Tribunal prinsipal ba Nasoens Unidas no ema hatene liu hanesan “Tribunal Mundu” nian. Só Estadu sira (nasaun sira) deit mak bele hola parte ba prosesu iha tribunal ne’e. UNCLOS fó jurisdisaun ba Tribunal Internasional ba Justisa hodi tesi disputa ba fronteira marítima entre nasaun sira. Tribunal Internasional ba Justisa iha Haia iha Olanda.

Área Konjunta Dezenvolvimentu Pertrolíferu

Área ida ne’ebé Tratadu Tasi Timor estabelese entre Austrália no Timor-Leste iha 2002. Timor-Leste no Austrália mak jere esplorasaun ba rekursu petróleu sira iha área ida ne’e.

Tribunal Arbitrajen Permanente (PCA)

Orgaun internasional ida hodi rezolve disputa sira. Tribunal Arbitrajen Permanente mak tesi disputa ba fronteira marítima no disputa sira seluk ne’ebé relasiona ho tratadu no investimentu sira. Estadu sira sei ba Tribunal Arbitrajen Permanente bainhira sira la bele rezolve disputa entre sira. Tribunal Arbitrajen Permanente iha Haia iha Olanda. Tribunal ida tuur iha Tribunal Arbitrajen Permanente mak tesi hela Arbitrajen ba Tratadu Tasi Timor entre Austrália no Timor-Leste.

Dalan ekidistânsia / sirkumstânsia relevante

Tribunal Internasional ba Justisa hili dalan moderna (no maioria husi orgaun rezolusaun ba disputa ba fronteira marítima) hodi determina fronteiras marítimas ba nasaun sira ne’ebé sira nia Zona Ekonómika Eskluziva tatulak malu. Tribunal Internasional ba Justisa no Tribunal Internasional ba Lei Tasi mos uza dalan ida ne’e.

Iha faze tolu ba dalan ida ne’e:

1. Dada liña ekidistânsia provizória ida (dada liña iha klaran entre pontu baze fíziku ne’ebé relevante husi Estadu idak-idak nia tasi-ibun);

2. Ajusta liña ne’e se iha sirkumstânsia relevante (ezemplu illa sira, efeitu husi tasi-ibun ne’ebé konkavu ka konvexu no diferensia iha tasi-ibun nia naruk, iha mos sirkumstânsia seluk tan); no

3. Haré fila fali se ajustamentu provizória ba liña ekidistânsia ne’e hanesan ba Estadu rua ne’e ka, lae (ezemplu, área marítima ne’ebé delimita ona no Estadu idak-idak nia tasi-ibun nia naruk).