Tetun Português English

EVENTU SIRA IHA PASADU

Konsiliasaun Obrigatória (Haia, 9-13 Outubru 2017)

Liu husi reuniaun sira ne’ebé konfidensial ho Komisaun Konsiliasaun iha Haia husi 9 to’o 13 Outubru, Timor-Leste no Austrália hetan ona akordu ba testu kompletu ba tratadu esbosu hanesan buat ne’ebé antisipa ona iha Akordu Pakote Abranjente husi 30 Agostu 2017. Tratadu esbosu ne’e delimita fronteira marítima entre nasaun rua ne’e iha Tasi Timor no koalia kona-ba estatutu legal kampu gás Greater Sunrise nian, estabelesimentu Rejime Espesial ida ba Greater Sunrise, dalan ida hodi halo dezenvolvimentu ba rekursu ne’e, no fahe reseita husi rezultadu ida ne’e. Parte sira agora buka atu hetan aprovasaun husi parlamentu hodi bele asina Tratadu ne’e. Parte sira mos sei kontinua envolve ho Joint Venture ba Greater Sunrise nian kona-ba dezenvolvimentu ba kampu gás Greater Sunrise, nune’e mos ho parte sira ne’ebé iha interese ho rekursu sira iha Tasi Timor.

Viazen ba Asembleia Jeral iha Naseons Unidas (Nova Iorke, 16-23 Setembru 2017)

Xefi Negosiador Xanana Gusmão vizita Estadus Unidus husi 16-23 Setembru, hola parte ba Governu Timor-Leste nia kontinuasaun ba estratéjia envolvimentu ho Estadus Unidus kona-ba fronteiras marítimas. Hola parte ba Xefi Negosiador nia vizita ba Nova Iorke ba Nasoens Unidas nia Asembleia Jeral no g7+ nia eventu, MBO organiza nia partisipasaun no prezensa ba eventu balu tuir marjen prosedimentu ofisial. Iha tan mos eventu sira ho ‘think tank’ (konjuntu espesialista ne’ebé fó konsellu no ideas kona-ba problema polítikus ka ekonomíkus), Embaixador sira husi CPLP nian no apoiante importante sira seluk iha Nova Iorke. Xefi Negosiador partisipa iha eventu komunidade balu ho komunidade Portugues-Amerikanu sira iha Rhode island no Massachusetts.

Konsiliasaun Obrigatória (28 Agostu – 1 Setembru 2017)

Iha 30 Agostu 2017, durante reuniaun konsiliasaun nian iha Kopenhagen, Timor-Leste no Austrália hetan akordu ho prinsípiu kona-ba akordu abranjente ida ba fronteira marítima. Data ida ne’e iha nia signifika istóriku ba Timor-Leste tanba loron ne’e marka aniversáriu ba 18 ba nia referendu ne’ebé lori ba Timor-Leste nia independénsia.
Hamutuk ho delimitasaun fronteiras marítimas, akordu Kopenhagen ne’e koalia kona-ba estatutu legal kampu gás Greater Sunrise nian, estabelesimentu Rejime Espesial ba dezenvolvimentu Greater Sunrise, dalan ida ba dezenvolvimentu rekursu ne’e, no buka dalan atu fahe reseita husi rezultadu ne’e.

GFM fahe informasaun ba diplomátika foinsae sira iha Ministériu Negásius Estranjeirus no Kooperasaun (29 Agostu 2017, Díli, Timor-Leste)

GFM hetan konvite atu ba fahe informasaun ba delegasaun sira ne’ebé sei ba atende Asembleia Jeral Nasoens Unidas nian ba dala 72 iha Nova Iorke, EUA no diplomata foinsae sira seluk, diretor sira no eis-embaixador sira kona-ba progresu Konsiliasaun Obrigatória entre Timor-Leste no Austrália.

Aprezentasaun ba ekipa ida husi Melbourne, Austrália (17 Agostu 2017, GFM, Palácio do Governo, Díli)

Sra. Kirsty Sword hodi grupu ida husi Austrália mai GFM hodi simu briefing badak ida kona-ba Konsiliasaun Obrigatória ho Austrália. Ekipa ne’e hakarak hatene kona-ba rezultadu prosesu ne’e nian ne’ebé relasiona ho dezenvelvimentu Timor-Leste nian iha futuru.

Konsiliasaun Obrigatória (24-28 Jullu 2017, Singapura)

Timor-Leste no Austrália kontinua partisipa iha sorumutuk sira ho Komisaun Konsiliasaun hodi buka solusaun ida ba disputa fronteira marítima iha Tasi Timor.
Nota imprensa Tribunal Permanente Arbitrajen (PCA) nian sita Prezidente, Embaixador Peter Taksøe-Jensen iha 9 Agostu 2017. Nia hateten, “Kestaun difisil sei iha nafatin, maibé ho boa vontade ne’ebé governu rua hatudu liu husi prosesu ida ne’e, Komisaun fiar nafatin katak ami sei bele hetan solusaun ba Parte sira nia diferensia sira no hodi hetan akordu ida.”
Sorumutuk hirak ne’e Tribunal Permanente Arbitrajen (PCA) mak administra.

Harii kapasidade GFM nian (Jullu-Agostu 2017)

GFM haruka funsinariu sira ba tuir treinamentu tuir área relevante ba sira nia servisu. GFM nia Ofisial Komunikasaun no Tradusaun tuir Institutu ba Peskiza Línguistika nian iha Universidade Kentucky, Estadus Unidus Amérika. Funsináriu Operasaun nian balu ba Portugal no Indonézia hodi tuir treinamentu kona-ba jestaun nian. GFM nia asesora legal junior hetan bolsu estudu hodi ba tuir Akadémia Rhodes ba Lei no Polítika Tasi nian iha Gresia. GFM sei kontinua investe iha funsináriu lokal ba dezenvolvimentu Timor-Leste nian.

Juiz Rapoza halo sesaun meza kabuar ho diplomata foinsae Timoroan sira (13 Jullu 2017, Díli, Timor-Leste)

GFM organiza Juiz Philip Rapoza ba partisipa iha diskusaun meza kabuar ida kona-ba justisa no lei ho diplomata foinsae sira husi Ministériu Negósius Estranjeirus no Kooperasaun.
Hanesan peritu iha área legal ne’ebé liu ona husi tinan 35 nia laran, Juiz Rapoza fahe nia matenek no esperiensia kona-ba importansia husi judisiaria independente ida no mós ho poder ne’ebé ketak-ketak.
Diplomata foinsae sira ne’e tuir sorumutuk ne’e ho didiak no husu pergunta importante sira kona-ba kestaun sira relasiona ho lei no justisa.

Viajen GFM nian ba Estadus Unidus Amérika (30 Jullu-15 Agostu 2017)

Delegasaun ida husi GFM vizita Estadus Unidus husi 30 Jullu to’o 15 Agostu 2017, hola parte ba Governu Timor-Leste nia kompromisu estratéjia kona-ba fronteiras marítimas. Ekipa Timor-Leste nian hasoru malu ho membru sira husi Kongresu Estadus Unidus nian no sira nia funsionáriu sira, membru sira husi Portuges Amérikanu Caucus sira no komunidade sira, no organizasaun non-governamental sira. Objetivu prinsipal mak atu fahe informasaun kona-ba Akte Autorizasaun Defeza Nasional nian (National Defence Authorisation Act) – lei ida ne’ebé koalia kona-ba Amerika nia defeza maioria no prioridade seguransa no inklui referénsia ba Timor-Leste nia disputa fronteira marítima ho Austrália. Ekipa ne’e fahe informasaun atual ba Kongresu sira kona-ba prosesu konsiliasaun ba fronteira marítima.

Konsiliasaun Obrigatória (6-9 Juñu 2017, Kopenhagen)

Sorumutuk kona-ba Konsiliasaun Obrigatória entre Timor-Leste no Austrália kontinua. Parte rua servisu hamutuk ho Komisaun Konsiliasaun hodi esplora solusaun ba nasaun rua ne’e.
Prezidente, Embaixador Peter Taksøe-Jensen konfirma katak, “Iha fulan hirak liu ba ne’e, Komisaun iha ona komprensaun ne’ebé klean kona-ba Parte sira nia interese no sira nia diferénsia ne’ebé fahe sira.”

Workshop iha Singapura kona-ba Fronteiras Marítimas (6-8 Juñu 2017)

Sentru Meridian Internasional iha Washington, D.C., parseria ho Departamentu Estadu ba Estadus Unidus Amérika (EUA) hodi fó fundu ba ofisial nain rua husi Gabinete Fronteiras Marítimas hodi partisipa iha Workshop ida kona-ba Fronteiras Marítimas nian husi 6-8 Juñu iha Universidade Nasional Singapura. Workshop ne’e Sentru ba Lei Internasional (CIL) no Sentru Nasional Austrália nian ba Rekursu Oseanu no Seguransa (ANCORS) mak organiza.

The participants with the trainers, facilitators and observers, on 6 June 2017.

Partisipante sira ho treinador sira, fasilitador sira no obzervador sira, iha 6 Juñu 2017. Fonte: UNS Sentru ba Lei Internasional

Konsiliasaun Obrigatória (26-31 Marsu 2017, Washington, DC)

Komisaun Konsiliasaun kontinua esplora parte idak-idak, Timor-Leste no Austrália nia pozisaun negosiasaun nian, hodi bele hetan akordu ida iha Setembru tinan ida ne’e.
Prezidente, Embaixador Peter Taksøe-Jensen rekoñese katak, “Kestaun hirak ne’e difisil ba Estadu ne’ebé deit, no hau haksolok tebes ho Parte sira nia maneira sira hodi tuir sorumutuk ne’e.”
Sorumutuk hirak ne’e Tribunal Permanente Arbitrajen (PCA) mak administra.

Aprezentasaun ba klubu Inglés (14 March 2017, UNTL, Díli, Timor-Leste)

Klubu Inglés iha Universidade Nasional Timor Lorosa’e (UNTL) konvida Gabinete Froneiras Marítimas hodi fó briefing ida kona-ba progresu konsiliasaun obrigatória entre Timor-Leste no Austrália. Klubu ne’e konsisti husi estudante sekundáriu sira, remata sekundáriu, no estudante universitáriu sira husi UNTL, Universidade Díli (UNDIL), Dili Institute of Technology (DIT), Institute of Business (IOB), no Universidade Oriental (UNITAL).

Estudante sira partisipa ativu iha briefing ne’e no husu pergunta barak kona-ba terminasaun CMATS nian, liña mediana no teória plataforma kontinental.

Hanesan símbolu ba sira nia apoia, estudante sira aprezenta prenda ida ba Gabinete Fronteiras Marítimas, abo lafaek ai furak ida.

Students of English Club

Estudante sira Klubu Inglés nian

Sai uma nain ba American Council of Young Political Leaders (ACYPL) (6-11 March 2017, Timor-Leste)

S.E. Primeiru-Ministru Dr Rui Maria de Araújo estabelese ona relasaun forte ida ho ACYPL ne’ebé hametin tiha ona durante nia vizita ofisial ida ba Washington DC iha Setembru 2016. Tuir fali ne’e, Governu Timor-Leste no ACYPL mos harri tiha ona parseiru kooperativa ida hodi halao Programa Interkámbiu Edukasional ida.

Hola parte ba programa interkámbiu ne’e, Gabinete Fronteiras Marítimas sai uma nain ba konvidadus ACYPL nian nain 5 husi Estadus Unidus Amérika husi 6-11 Marsu 2011. Delegasaun sira ne’e mak Ellie Casson, husi Gabinete Asuntu Governamentais no Parseria Estratéjika, Airbnb; Onoráriu James Diossa, Prezidente Kámara ba Central Falls, Rhode Island; Onoráriu Aaron Lawlor, Prezidente ba Konsellu Lake County, Illinois; Libby Rosenbaun, Interinu Diretora Ezekutiva ba ACYPL; no Stacey Walter Fujii, Prezidente ba Konsellu ACYPL nian.

Vizita ne’e hanesan oportunidade ida ba delegasaun sira hodi aprende kona-ba istória Timor-Leste nian. Sira hasoru líderes importante sira inklui S.E. Primeiru-Ministru Dr Rui Maria de Araújo, S.E.

Ministru Kay Rala Xanana Gusmão, Xefi Negosiador, S.E. Ministru Agio Pereira no S.E. Dr José Ramos-Horta. Sira mos koalia ho foinsae polítika sira iha konsellu nasional juventude (CNJTL), foinsa diplomata sira iha Ministériu Negosius Estranjeirus, vizita Fundasaun ALOLA no halao viajen ba munisipiu sira hodi vizita projetu agrikultura USAID nian iha Atabae no deskansa iha Balibo.

Delegasaun sira mos simu informasaun kona-ba importánsia ba delimitasaun ba Timor-Leste nia fronteira tasi nian.

Hanesan parte husi Programa Interkámbiu Edukasional ida ne’e mos, Timor-Leste nia delegasaun líderes foinsae balu sei vizita Washington DC iha Outubru 2017. Programa ne’e nia objetivu atu líderes foinsae sira ne’e bele hetan esperiénsia prátiku kona-ba sosiedade sivil sira nia iha papel hodi halo polítika sira.

Some of the Maritime Boundary Office team with the ACYPL

Ekipa Gabinete Fronteiras Marítimas nian balu ho ACYPL

Aprezentasaun ba Igreja Protestante iha Timor-Leste, Sínodo (14 Fevereiru 2017, Sínodo, Díli, Timor-Leste)

Igreja Protestante iha Timor-Leste konvida Gabinete Fronteiras Marítimas atu fó briefing ida kona-ba progresu delimitasaun ba fronteiras marítimas ho Timor-Leste nia viziñu rua: Indonézia no Austrália.

Ekipa Gabinete Fronteiras Marítimas balu ho komunidade SÍNODO nian Komunidade sira agradese tebes ba informasaun sira ne’e no sira fó sira nia apoia ba susesu tomak liu husi sira nia orasaun.

Some of Maritime Boundary Office team with the SÍNODO community

Série CIL Fireside Chat kona-ba Konsiliasaun Obrigatória UNCLOS nian: Timor-Leste v. Austrália nia Disputa ba Fronteiras Marítimas (10 Fevereiru 2017, Universidade Nasional Singapura, Singapura)

Painel sira kobre aspetu importante rua kona-ba prinsípiu jeral ba Konsiliasaun nian tuir UNCLOS no kona-ba Konsiliasaun entre Timor-Leste no Austrália. Iha ema 60 mak partisipa iha sesaun ne’e, husi korpu diplomata sira (Ambasador Portugal, Tailándia no Timor-Leste nian ba Singapura, Reprezentativu husi Repúblika Angola), ofisiais governu nian, emprezáriu no akademia sira.

Haree aprezentasaun sira iha ne’e: https://cil.nus.edu.sg/programmes-and-activities/past-events/unclos-compulsory-conciliation

The panellists

Konsiliasaun Obrigatória (16-20 Janeiru 2017, Singapura)

Komisaun Konsiliasaun hasoru malu ho Parte rua: Timor-Leste no Austrália. Ida ne’e hola parte ba prosesu Konsiliasaun nian molok Komisaun fó sai relatóriu final no rekomendasaun iha Setembru 2017.
Hola parte ba pakote medida integradu ne’ebé konkorda tiha ona iha Outubru 2016, Parte rua hamutuk ho Komisaun fó sai deklarasaun konjunta ida iha 9 Janeiru 2017 anunsia Timor-Leste nia intensaun hodi hakotu Tratadu CMATS. Timor-Leste notifika Austrália iha loron tuir mai kona-ba nia intensaun ne’e no tratadu ne’e sei mate iha 10 Abril 2017.
Timor-Leste mos hapara tiha kazu rua nia levanta kontra Austrália iha Tribunal Internasional ba Justisa kona-ba espionajen no jurisdisaun fiskal.

Aprezentasaun ba Parlamentu Nasional kona-ba hakotu CMATS (10 Janeiru 2017, Parlamentu Nasional, Díli, Timor-Leste)

Ministru Xanana Gusmão, Xefi Negosiador aprezenta Governu ho rezolusaun ida atu hakotu CMATS ba Parlamentu Nasional. Terminasaun ne’e hetan votus unanimidade (hotu-hotu konkorda) husi membru Parlamentu sira.

Ministru Agio Pereira, Ministru Alfredo Pires, Prezidente & Diretor Ezekutivu Timor Gap, Sr Francisco Monteiro, Prezidente ANPM, Sr Gualdino da Silva, no Diretora Ezekutiva GFM, Sra Elizabeth Exposto mos partisipa iha reuniaun ne’ebé taka ba públiku ne’e.

Konferénsia kona-ba “Desizaun ba Tasi Sul Xina nian: Diménsaun Legal” (5-6 Janeiru 2017, Singapura)

Sentru ba Lei Internasional nian (CIL) iha Universidade Nasional Singapura nian konvida Gabinete Fronteiras Marítimas hodi tuir konferénsia ba “Desizaun ba Tasi Sul Xina nian: Diménsaun Legal”. Nia objetivu mak “atu ezamina konkluzaun legal ne’ebé fó sai iha desizaun ne’e hodi komprende nia signifika ba dezenvolvimentu ba lei tasi nian no nia implikasaun ba rezolusaun ba iha futuru.” Diskusaun ne’e haree liu-liu ba perspetiva legal no akadémiku.

Haree aprezentasaun sira iha ne’e: https://cil.nus.edu.sg/programmes-and-activities/past-events/cil-scs-award-conference

Xefi Negosiador Sr. Xanana Gusmão no Sekretáriu-Jeral ONU Sr. Ban Ki-moon (ONU nia foto/Rick Bajornas)

(K-L) Senador Alan Peter S. Cayetano husi Filipina, Profesor Tommy Koh husi CIL Singapura, Adelsia da Silva husi GFM, Felismina dos Reis husi GFM, no Dr Hao Phan husi CIL Singapura

Parlamentu Nasional Vizita Gabinete Fronteiras Marítimas (16 Dezembru 2016, Palácio do Governo, Díli, Timor-Leste)

Ministru Xanana Gusmão, Xefi Negosiador aprezenta progresu konsiliasaun obrigatória nian ba Prezidente Parlamentu Nasional Adérito Hugo da Costa, Vise Prezidente, Xefi Bankada sira, no Komisaun Eventual Akompañamentu ba Prosesu Negosiasaun ba Fronteiras Marítimas.

Primeiru-Ministru Dr Rui Maria de Araújo, Ministru Agio Pereira, Prezidente ANPM, Sr Gualdino da Silva, Diretora Ezekutiva ba GFM, Sra Elizabeth Exposto, no Ofisial Ligasaun Primeiru-Ministru nian ba Kestaun Veteranus, Sra Inês Almeida mos prezente iha reuniaun ne’e.

Aprezentasaun ba Estudante sira husi Universidade Curtin (5 Dezembru 2016, Muzeu Rezisténsia Nasional, Díli, Timor-Leste)

Tuir fali palestra ne’ebé susesu iha Dezembru 2015, iha tan pedidu id aba Gabinete Fronteiras Marítimas atu koalia kona-ba estudante sira husi Universidade Curtin, Perth, Austrália iha Dezembru 2016.

Diretora Ezekutiva, Sra. Elizabeth Exposto aprezenta Timor-Leste nia istória inklui nia istória rasik hanesan foinsae ida no nia kontribuisaun ba Timor-Leste nia independénsia. Sra. Exposto mos koalia kona-ba aranjus Marítimas sira ne’ebé iha Tasi Timor inklui detallu husi tratadu sira molok ne’e no nia hakotu nia aprezentasaun ho progresu konsiliasaun obrigatória nian ne’ebé Timor-Leste hahú ho Austrália iha Abril 2016.

Estudante sira husu pergunta oin-oin kona-ba apoia rejoional nian, seguransa iha Tasi Timor no futuru ne’ebé diak ba nasaun ne’e. Sira dehan istória ne’e halo sira sente iha obrigasaun no sira hakarak fó asisténsia bainhira presiza.

Sr Edio Guterres, Ofisial Ligasaun Primeiru-Ministru nian ba Sosiedade Sivil mos partisipa iha sesaun Pergunta no Resposta.

Xefi Negosiador Sr. Xanana Gusmão no Sekretáriu-Jeral ONU Sr. Ban Ki-moon (ONU nia foto/Rick Bajornas)

Gabinete Fronteiras Marítimas ho partisipante sira iha Arquivo no Muzeu Rezisténsia Timorense

Selebra aniversáriu 41 ba Timor-Leste nia independénsia (24-28 Novembru 2016, Lospalos, Munisípiu Lautem, Timor-Leste)

Atu selebra Timor-Leste nia independénsia Gabinete Fronteiras Marítimas (GFM) hetan konvite hodi partisipa iha feira ida husi 24-28 Novemberu iha Losplaos, Munisípiu Lautem. GFM uza Baraka ida hamutuk ho Ministeriu Planeamnetu no Investimentu Estratéjiku.

Ema 900 resin husi profisaun no tinan oin-oin mak vizita GFM nia baraka.

Reuniaun Konsellu ba Delimitasaun Definitiva ba Fronteiras Marítimas (19 Outubru 2016, Ministériu Negosius Estranjeirus no Kooperasaun, Díli, Timor-Leste)

Primeiru-Ministru Dr Rui Maria de Araújo no Ministru Xanana Gusmão, Xefi Negosiador informa ba Konsellu ba Delimitasaun Definitiva ba Fronteiras Marítimas kona-ba progresu konsiliasaun obrigatória ho Austrália.

Nasoens Unidas nia Konsiliasaun Obrigatória (Agostu-Outubru 2016)

Iha 29 Agostu, Ministru Xanana Gusmão, Xefi Negosiador, Agio Pereira, Ministru Estadu no Prezidente ba Konsellu Ministru no Sra. Elizabeth Exposto, Diretora Ezekutiva GFM, hanesan Reprezentante no Vise-Reprezentante, hodi reprezenta Timor-Leste iha audensia públika ida iha Haia. Timor-Leste no Austrália hetan oportunidade hodi aprezenta sira nia kazu ba Komisaun no ba mundu. Austrália fó objesaun ba Komisaun nia Jurisdisaun, maibé iha 26 Setembru 2016, Komisaun ne’e fó sai katak sira foti ona desizaun sira iha kompetênsia no sei kontinua ho prosesu sira ne’e. Tuir fali mai, parte sira sei hasoru malu tan ho Kimisaun iha Singapura iha Outubru no sei halao reuniaun balu tan bainhira 2017 hahú.

Xefi Negosiador Sr. Xanana Gusmão no Sekretáriu-Jeral ONU Sr. Ban Ki-moon (ONU nia foto/Rick Bajornas)

Lansamentu filme Time to Draw the Line (11 Outubru 2016, Uma Parlamentu Kánbera, Austrália)

Gabinete Fronteiras Marítimas atende lansamentu filme ba dokumentáriu ida ne’ebé hanaran Time to Draw the Line (Tempu to’o ona, atu dada liña ne’e). Filme ne’e dokumentáriu ida ne’ebé Estudante sira Klubu Inglés nian emosional teb-tebes no lori mensajen forte ne’ebé aprezenta povu Austrália nia opiniaun kona-ba kestaun fronteiras marítimas entre Austrália no Timor-Leste. Filme ida ne’e hatudu ema Australianu koñesidu sira husi profisaun oin-oin.

Amanda King no Fabio Cavadini husi Frontyard Films mak produz Time to Draw the Line ne’e ho Janelle Saffin no Inês Almeida hanesan sira nia ko-produser.

Vizita ba Estadus Unidus Amérika (Setembru 2016, EUA)

Primeiru-Ministru Dr Rui Maria de Araújo, Ministru Xanana Gusmão, Xefi Negosiador no Ministru Negósius Estranjeirus Hernâni Coelho vizita Estadus Unidus ba Reuniaun Asembleia Jeral Nasoens Unidas nian iha Setembru 2016.

Primeiru-Ministru fó nia diskursu iha Asembleia Jeral iha Nova Iorke iha 24 Setembru no koalia kona-ba importânsia hosi hametin fronteiras marítimas permanente ba Timor-Leste nia auto-sufisiensia ekonómika (hodi halao nia ekonómia rai laran mesak). Hafoin ne’e delegasaun sira ba vizita universidade no komunidade sira iha Rhode Island, Massachusetts no Indiana ne’ebé ho lasu kultura no patrimóniu Portugueza ne’ebé forte. Sua Eselénsia fó agradesementu ba komunidade sira ne’e ba sira nia solidariedade no apoia durante Timor-Leste nia luta ba independénsia iha tinan 1990 nia laran.

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16

Lansamentu Timor-Leste nia Dokumentu Polítika kona-ba Fronteiras Marítimas (29 Agostu 2016, Ministeriu Negosius Estranjeirus no Kooperasaun, Díli, Timor-Leste)

Primeiru-Ministru Dr Rui Maria de Araújo lansa Timor-Leste nia Dokumentu Polítika kona-ba nia Fronteiras Marítimas iha Ministériu Negósius Estranjeirus no Kooperasaun iha Díli. Dokumentu ne’e fó rezumu ba prinsípiu relevante sira ba lei tasi nian no Timor-Leste nia fronteiras tasi nian sei to’o iha ne’ebé tuir lei internasional. Iha eventu lansamentu ne’e, partisipante sira mos haree transmisaun direta ba audensia públika kona-ba konsiliasaun obrigatória iha Haia. Ministru Xanana Gusmão, Xefi Negosiador mos lansa Dokumentu ne’e iha tempu hanesan iha Haia.

  1. 1
  2. 2
  3. 3
  4. 4
  5. 5
  6. 6

Grupu Feto ida vizita Gabinete Fronteiras Marítimas (15 Augostu 2016, Gabinete Fronteiras Marítimas, Palácio do Governo, Díli, Timor-Leste)

Grupu Feto ida hanaran Minervas vizita fatin sira iha Timor-Leste no husu atu hetan briefing ida husi Gabinete Fronteiras Marítimas kona-ba istória no razaun sira tanba sa mak Timor-Leste luta ba nia fronteiras marítimas ho nia viziñu rua.

Visit from an Australian Women´s Group

Aprezentasaun ba komunidade Igreja Evenjélika Presbiteriana Ebenezer (15 Agostu 2016, Díli, Timor-Leste)

Gabinete Fronteiras Marítimas simu konvite ida hodi ba fahe informasaun kona-ba progresu Timor-Leste nia luta ba nia fronteiras marítimas ho Indonesia no Austrália. Besik ema 50 mak atende sesaun ne’e husi munisípiu sira iha Timor-Leste nia laran.

Komunidade ne’e fó sira nia apoia ba Timor-Leste nia luta liu husi sira nia orasaun no hatudu sira nia nia konfiansa iha Xefi Negosiador.

Presentation to community of Ebenezer Presbyterian Evangelical Church

Vizita husi Delegasaun Laos nian (11 Augostu 2016, Gabinete Fronteiras Marítimas, Palácio do Governo, Díli, Timor-Leste)

Diretora Ezekutiva ba Gabinete Fronteiras Marítimas, Elizabeth Exposto fahe informasaun balu ba delegasaun ida husi Ministériu Negósius Estranjeirus Laos nian kona-ba Timor-Leste nia luta ba nia fronteiras marítimas. Diretora Ezekutiva ne’e koalia kona-ba Timor-Leste nia istória luta ba nia indepéndensia no fahe mos informasaun kona-ba prosesu konsiliasaun obrigatória ho Austrália. Delegasaun ne’e dehan katak sira haksolok tebes hodi haree funsiunariu GFM nian maoria feto.

Visit from Laos Delegation

Reuniaun ho Xefi Adjunta ba Misaun Embaixada Amérika nian ba Timor-Leste (10 Augostu 2016, Gabinete Fronteiras Marítimas, Palácio do Governo, Díli, Timor-Leste)

Hanesan Xefi Adjunta ba Misaun Embaixada Amérika nian ba Timor-Leste, Sra. JL LittleJohn vizita Gabinete Fronteiras Marítimas hodi simu briefing ida kona-ba istória no razaun sira tanba sa mak Timor-Leste luta ba nia fronteiras marítimas ho nia viziñu rua: Indonézia no Austrália.

Meeting with Deputy Chief of Mission of the US Embassy to Timor-Leste

(K-L) Sra Elizabeth Exposto, Diretora Ezekutiva ba Gabinete Fronteiras Marítimas no Sra Jr Littlejohn, Xefi Adjunta ba Misaun Embaixada Amérika nian ba Timor-Leste

Reuniaun Konsellu ba Delimitasaun Definitiva ba Fronteiras Marítimas (8 Agostu 2016, Ministériu Negosius Estranjeirus no Kooperasaun, Díli, Timor-Leste)

Reuniaun Konsellu ba Delimitasaun Definitiva ba Fronteiras Marítimas ne’ebé Primeiru-Ministru Dr Rui Maria de Araújo mak lidera halao ohin iha Ministériu Negosius Estranjeirus no Kooperasaun (MNEC). Reuniaun ne’e atu hodi inform aba membru Komisaun Konsultiva sira kona-ba progresu konsiliasaun obrigatória nian ho Austrália ne’ebé Timor-Leste hahú iha Abril 2016. Durante reuniaun ne’e Komisaun Konsultiva mos fó sira nia aprovasaun hodi lansa Dokumentu Polítika – dokumentu ne’ebé koalia kona-ba Timor-Leste nia direitu tuir lei internasional.

Konferénsia “Orden Legal iha Mundu Oseanu: Nasoens Unidas nia Konvensaun be Lei Tasi nian” (27-28 Juñu 2016, Sede ONU, Sidade Nova Iorque, EUA)

Gabinete Fronteiras Marítimas atende Konferénsia Anual ba dala 40 ba Sentru ba Lei no Polítika ba Oseanu. Konferénsia loron rua ne’e koalia kona-ba tópiku oin-oin inklui Asuntu Oseanu no Lei Tasi nian no Tribunal Internasional ba Lei Tasi nian (ITLOS) no nia kontribuisaun ba lei tasi nian.

Haree aprezentasaun sira iha ne’e http://www.virginia.edu/colp/annual-conference.html

Legal Order in the World´s Oceans

Workshop ba Forum Marítima Habelar ASEAN nian (EAMF) (31 Maiu – 2 Juñu 2016, Hanoi, Vietnam)

Forum Marítima Habelar ASEAN (EAMF) konvida Gabinete Fronteiras Marítimas hodi atende workshop ida iha 31 Maiu – 2 Juñu 2016 iha Hanoi, Vietnam. Workshop ida ne’e kontinuasaun husi EAMF nia semináriu ba dahuluk ne’ebé halao iha Agustu 2015 iha Indonézia.

Workshop ne’e ho nia tema “Lei Internasional no Prátika diak liu sira iha Delimitasaun ba Fronteiras Marítimas no Akordu Provizional husi Prátika Natureza”.

Panelista sira konstitui husi perítu mundial sira ba lei internasional ba tasi nian. Sira analiza ho klean Artigu 74(3) no 83(3) husi Nasoens Unidas nia Lei Tasi nian (UNCLOS) no dezenvolvimentu foun ne’ebé relasiona ho lei internasional ba tasi nian. Nune’e mos, sira haree ho klean estudu oin-oin hanesan Tratadu Tasi Timor, akordu sira husi Golfu Tailándia no Malázia, no husi Aziátiku Leste (Koreia, Japaun, Xina no Taiwan).

Departamentu Estadus Unidus no Akademia Diplomátika Vietnam mak koorganiza no kolabora hamutuk ho Sentru Lei Internasional, Universidade Nasional Singapura no Austrália, Sentru Nasional Rekursu ba Oseanu no Seguransa, Universidade Wollongong.

EAMF nia Workshop

EAMF nia Workshop

Konferênsia Internasional iha Díli (19 Maiu 2016, CCD)

Iha 19 Maiu 2016, Governu Timor-Leste aprezenta Konferênsia Internasional iha Díli: Fronteiras Marítimas no Lei Tasi nianhodi komemora aniversariu Tribunal Internasional ba Lei Tasi nian (ITLOS) ba dala 20. Konferênsia ne’e hodi promove papel tribunal internasional nian no fornese forum ida hodi halo diskusaun ba kestaun fronteira marítima ne’ebé atual no ne’ebé foin mosu.

Dokumentu ba konferénsia
Programa ba konferénsia
Haree destake ba Konferênsia

Lé aprezentasaun sira husi:
Juiz Vladimir Golitsyn, Prezidente, Tribunal Internasional ba Lei Tasi nian
S.E Dr.Rui Maria de Araújo, Primeiru-Ministru, Timor-Leste
S.E Ministro Dionísio Babo Soares, Ministru Estadu, Koordenador Asuntu Administrasaun no Justisanian no Ministru Administrasaun Estatal
Embaixador Eddy Pratomo, Repezentante Espesial ba delimitasaun ba Fronteiras Marítimas, Indonézia
Sr. I Made Andi Arsana, Professor ba Enjeñaria Jeodésika no Jeográfia, Universidade Gadjah Mada, Indonézia
Sra. Jalila Abdul Jalil, Investigador Sénior, Institutu Marítimu Malázia
Dr.Hao Duy Phan, Investigador Sénior, Sentru ba Lei Internasional nian, Universidade Nasional Singapura

Hasoru malu ho Sekretáriu-Jeral Sr. Ban Ki-Moon (13 Abril 2016, Sede ONU, Nova Iorke)

Iha 13 Abril, Xefi Negosiador Xanana Gusmão hasoru malu ho Sekretáriu-Jeral ba Nasoens Unidas, S.E. Sr. Ban Ki-moon iha Nova Iorke hodi koalia kona-ba dezenvolvimente atual iha Timor-Leste no informa ba Sekretáriu-Jeral kona-ba notifikasaun ba konsiliasaun kompulsoria.

ONU nia video

Xefi Negosiador Sr. Xanana Gusmão no Sekretáriu-Jeral ONU Sr. Ban Ki-moon (ONU nia foto/Rick Bajornas)

Xefi Negosiador Sr. Xanana Gusmão no Sekretáriu-Jeral ONU Sr. Ban Ki-moon (ONU nia foto/Rick Bajornas)

Reuniaun ba Komisaun Konsultiva (11 Abril 2016, Ministeriu Negosius Estranjeirus no Kooperasaun, Díli, Timor-Leste)

Komisaun Konsultiva hahú fali enkontru iha 11 Abril 2016 ne’ebé Primeiru-Ministru Dr. Rui Maria de Araújo mak lidera. Enkontru ne’e koalia liu-iu kona-ba notifikasaun ba konsiliasaun kompulsoria ba Governu Austrália relasiona ho fronteiras marítimas.

Reuniaun membru Komisaun Konsultiva

Reuniaun membru Komisaun Konsultiva

Lansamentuba Gabinete Fronteiras Marítimas nia website (Palácio do Governo, 29 Fevereiru 2016)

Primeiru-Ministru Dr.Rui Maria de Araújo no Xefi Negosiador Ministru Xanana Gusmão lansa Gabinete Fronteiras Marítimas nia website iha 29 Fevereiru 2016.

Diskursu sira ba lansamentu ba GFM nia website.

  1. 1
  2. 2
  3. 3
  4. 4

Semináriu kona-ba Tasi Timor (15-16 Fevereiru 2016, Melbourne, Austrália)

Gabinete Fronteiras Marítimas atende semináriu durante loron rua kona-ba Tasi Timor ne’ebé kámara Lei Universidade Monash nian no Programa Antropolojia Fakuldade Siénsia Sosiais mak organiza. Semináriu ne’e haree ba perspetiva nasional no internasional ba disputa fronteira marítima entre Estadu viziñu sira. Semináriu ne’e mos haree ba impaktu husi rekursu sira ba dezenvolvimentu Timor-Leste nian.

Semináriu Fronteiras Marítimas iha Tasi Timor: Perspetiva sira iha Lei Internasional

Avo Lafaek iha Tasi Timor: dezenvolvimentu no socio-ekonómiku nia implikasaun ba disputa rekursu marítima

Aprezentasaun ba Organizasaun ba Kombatentes ba Rezistênsia Nasional (29 Dezembru 2015, Aileu, Timor-Leste)

Iha 29 Dezembru 2015, Gabinete Fronteiras Marítimas hetan konvite hodi halo aprezentasaun ba veteranus sira, iha Aramerí, Suku Liurai, Aileu kona ba progresu ba negosiasaun ba fronteiras marítimas ho Austrália no Indonézia.

Ida ne’e hanesan oportunidade ba Gabinete Fronteiras Marítimas hodi esplika istória kona ba akordu hirak ne’ebé halo ona kona ba Tasi Timor ho Austrália husi 1972 to’o 2006.

  1. 1
  2. 2
  3. 3
  4. 4
  5. 5

Ministru Gusmão hetan prémiu Karta Doutoradu ida, "honoris causa", husi Universidade Melbourne (7 Dezembru 2015, Melbourne, Austrália)

Ministru Xanana Gusmão, eis-Prezidente no Primeiru-Ministru Timor-Leste nian, hetan prémiu Karta Doutoradu ida, “honoris causa, husi Universidade Melbourne. Sr. Gusmão, agora dadaun hanesan Ministru ba Planeamentu no Investimentu Estratéjiku ba Timor-Leste, koalia kona ba kestaun oin-oin iha nia diskursu, nota katak loron okupasaun ba Timor-Leste hahú iha loron ida ne’e iha tinan 40 liu ba.

Ministru Xanana mos temi kona ba fronteiras marítimas:

“Timor-Leste no Indonézia ohin loron mak sai ezemplu pozitivu ba servisu hamutuk entre mundu musulmanu no la-musulmanu.

Ami nia komitmentu hodi negosia fronteiras marítimas ne’e ezemplu foun ida ne’ebé forte ne’ebé tuir dalan rekonsiliasaun.

Timor-Leste nia Governu halo tiha ona delimitasaun ba fronteiras marítimas permanente ne’e nasaun nia prioridade ida tanba ida ne’e mak hanesan hakat ikus ba ami nia luta naruk ba ami nia soberania.

Indonézia no Timor-Leste hahú ona negosiasaun ba fronteiras marítimas no korkorda tiha ona atu lao tuir prinsipiu ne’ebé fó sai ona iha Nasoens Unidas nia Konvensaun ba Lei Tasi nian iha 1982 no lei internasional.

Austrália fali lakohi negosia fronteira marítima ida ho Timor-Leste no Timor-Leste la bele lori kestaun ne’e ba arbitrador independente ida hodi determina.

Ida ne’e tanba iha 2002, iha kalan Timor-Leste nia independênsia, Austrália hasees-aan tiha husi mekanizmu obrigatória ba disputa tuir Nasoens Unidas nia Konvensaun ba Lei Tasi nian ba disputa saida deit ne’ebé relasiona ho delimitasaun ba nia zona marítima.

No nune’e hau husu ba Austrália nia Governu foun, atu rekoñese ida ne’e iha Austrália nia interese nasional atu iha fronteira marítima ida ne’ebé define ho loloos iha Tasi Timor.

Ami luta ba injustisa iha Tasi Timor atu nune’e ami bele remata ami nia esforsu ba ami nia luta ba indepêndensia no atinji ami nia direitu ba soberania tuir lei internasional. Ami kontinua hanesan idealista nafatin.”

Aprezentasaun ba estudante sira husi Universidade Curtin no Veteranus sira (2 Dezembru 2015, Arkivu no Muzeu Rezistênsia, Díli, Timor-Leste)

Ho senáriu istóriku Arkivu & Muzeu Rezistênsia nian, Gabinete Fronteiras Marítimas fó aprezentasaun ba grupu boot estudante sira husi Universidade Curtin, Austrália Osidental ne’ebé vizita hela Timor. Membru sira husi komunidade Veteranus no reprezentante husi Primeiru-Ministru nia Gabinete mos atende aprezentasaun ne’e.

Sra Elizabeth Exposto, Diretora Exekutiva husi Gabinete Fronteiras Marítimas koalia barak kona ba istória disputa Tasi Timor nian. Nia mos koalia kona ba progresu konsultasaun ho Indonézia no tentativa sira atu koalia ho Austrália. Bainhira Gabinete Fronteiras Marítimas esplika istória Tasi Timor nian ho termu simples, no tanba sa mak Timor-Leste buka fronteiras marítimas tuir lei internasional, estudante sira laran monu ba kestaun ne’e no hakarak hatene liu tan.

Konferênsia Internasional no Semináriu Tékniku iha Londres (30 Novembru to’o 2 Dezembru 2015)

Husi 30 Novembru to’o 2 Dezembru 2015, Gabinete Fronteiras Marítimas, hamutuk ho Ministériu Negósius Estranjeirus no Kooperasaun, partisipa iha Konferênsia Fronteira Internasional iha Londres ho nia tema “Explora Aprosimasaun ne’ebé Integradu ba Fronteira Internasional no Kestaun Teritórial”.

TKonfêrensia ne’e eventu ida ne’ebé la’os hodi buka lukru. Volterra Fietta, King’s College of London (Departamentu Jeografia), Marbdy Consulting Ltd no Maritime Zone Solutions Ltd mak organiza.

Orador sira mak espesialista mundu nian no pratikante sira iha rezolusaun efetivu ba teritórial ne’ebé iha disputa. Partisipante sira mai husi mundu tomak no husi profesaun oioin, inklui lei, akademia no diplomasia.

  • Semináriu delimitasaun ba fronteira ho Dr. Robin Cleverly (sorin loos) iha 30 Novembru 2015.
  1. 1
  2. 2

Aprezentasaun ba Organizasaun Kombatentes Rezistênsia Nasional (19 Novembru 2015, Venilale, Timor-Leste)

Iha Novembru 2015, Gabinete Fronteiras Marítimas hetan konvite ida hodi halo aprezentasaun ba Organizasaun Kombatentes Rezistênsia Nasional [OCRN] iha Venilale, Munisípiu Baukau. Xefi Exekutiva ba Gabinete Fronteiras Marítimas, Sra. Elizabeth Exposto, no Komunikasaun Ofisial, Felismina Carvalho dos Reis, koalia kona ba Timor-Leste nia luta ba fronteiras marítimas no lei internasional ne’ebé relevansia, inklui Lei Tasi nian. Gabinete Fronteiras Marítimas hakarak agradese OCRN ba oportunidade hodi bele informa ba membru veteranus sira kona ba prioridade nasional importante ida ne’e.

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11

Eventu husi Institutu Internasional ba Dame (IPI) (1 Outubru 2015, Nova Iorque)

Iha 1 Outubru, Gabinete Fronteiras Marítimas no Institutu Internasional ba Dame organiza hamutuk eventu ida ne’ebé ema barak mak atende ho nia orador distintu iha painel ne’ebé inklui Primeiru-Ministru Dr. Rui Maria de Araújo, Ministru Xanana Gusmão no Eis Presidente Dr. José Ramos-Horta. Sira idak-idak fahe sira nia vizaun no afirma katak Timor-Leste nia objetivu hodi difini fronteiras marítimas permanente ho nasaun viziñu sira mak hanesan kapítulu tuir mai iha nasaun Timor-Leste nia luta ba nia soberania.

Hanehan iha ne’e ba Primeiru-Ministru Rui Maria de Araújo nia diskursu

Hanehan iha ne’e ba Ministru Gusmão nia diskursu

Hanehan iha ne’e ba Dr Ramos-Horta nia diskursu

Hanehan iha ne’e ba IPI nia vídeo

IPI_Photo_1

(K – L): Dr. Ramos-Horta, Primeiru-Ministru Rui Maria de Araújo, Ministru Gusmão no Gabinete Fronteiras Marítima nia Diretora Exekutiva Sra. Elizabeth Exposo iha Eventu IPI, Nova Iorque.

Primeiru-Ministru nia diskursu no enkontru iha Nasoens Unidas iha Nova Iorque (Setembru 2015)

Iha Setembru 2015, Primeiru-Ministru hato’o diskursu balu ne’ebé koalia maka’as kona ba Timor-Leste nia objetivu hodi defini ba fronteiras marítimas permanente hanesan prioridade nasional iha Asembleia Jeral Nasoens Unidas iha Nova Iorque, no mos iha Forum ba Líderes Mundiais iha Universidade Columbia.

Gabinete Fronteiras Marítimas suporta delegasaun husi Timor-Leste ba Nasoens Unidas iha Nova Iorque, no mos iha eventu sira seluk. Gabinete Fronteiras Marítimas mos halo enkontru ida ho instituisaun xave ida hanesan, Nasoens Unidas nia Divizaun ba Asuntu Oseanu no Lei Tasi nian.

Iha 29 Setembru, Primeiru-Ministru hasoru malu ho Senador George Mitchell, polítiku Amerikanu bo’ot ne’ebé fahe nia esperiênsia no hanoin kona ba rezolusaun ba disputa no konflitu internasional sira.

UN General Assembly PM 1

Profesor Vaughan Lowe QC nia Palestra (Septembru 2015)

Profesor Vaughan Lowe, Liurai Feto Elizabeth nia Advogadu, péritu koñesidu iha mundu kona ba lei tasi nian no Profesor “Emiritus Chichele” ba Lei Públiku Internasional iha Universidade Oxford, aprezenta palestra ida no iha mos sesaun ba pergunta no resposta kona ba lei tasi nian iha Universidade Nasional Timor-Leste (UNTL). Eventu ne’e organiza husi Ministériu Negósius Estrajeirus no Kooperasaun. Eventu ida ne’e mos fó oportunidade ba timoroan sira ne’ebé partisipa atu komprende didiak prinsípiu halo delimitasaun fronteiras marítimas no tanba sa mak kestaun ida ne’e importante ba Timor-Leste.

Reuniaun Komisaun Konsultiva (2015)

Komisaun Konsultiva ba Governu Timor-Leste, forma iha 2015, konsisti husi líder eminente pasadu no prezente sira nasaun nian no fó konsellu ba Primeiru-Ministru kona ba Timor-Leste nia luta ba nia fronteiras marítimas. Komisaun ne’e enkontru dala barak iha tinan ne’e nia laran.

Consultative Commission 1

Membru Komisaun Konsultiva.

Semináriu kona ba Tribunal Internasional ba Lei Tasi (27, 28 Agustu 2015, Indonézia)

Gabinete Fronteiras Marítimas (GFM) partisipa iha Tribunal Internasional ba Lei Tasi nian [ITLOS] nia semináriu rejional ba dala XI ne’ebé halao iha Bali, Indonézia iha 27 no 28 Agustu 2015.